இட்லி, தோசைக்கு ஒருடைம் இந்த கதம்ப சட்னியை செய்யுங்க.. அப்புறம் பாருங்க அடிக்கடி செய்வீங்க..

காலையில் இட்லி, தோசைக்கு ஒரு வித்தியாசமான சுவையில் சைடு டிஷ் செய்ய நினைக்கிறீர்களா? அதுவும் செய்வதற்கு மிகவும் சிம்பிளாக, அதே சமயம் புதுமையான சுவையில் சைடு டிஷ் செய்ய வேண்டுமா? அப்படியானால் கதம்ப சட்னியை செய்யுங்கள்.

இந்த சட்னியை சுவைத்தால், அதில் தேங்காய் சட்னி, மல்லி சட்னி, புதினா சட்னி என அனைத்து விதமான சட்னியின் சுவையையும் அனுபவிக்கலாம். இந்த சட்னியை இட்லி, தோசையுடன் சேர்த்து சாப்பிடும் போது, இட்லி, தோசையானது கணக்கில்லாமல் உள்ளே போகும். முக்கியமாக இந்த சட்னியை ஒருமுறை வீட்டில் உள்ளோருக்கு செய்து கொடுத்தால் அடிக்கடி செய்ய சொல்லி கேட்பார்கள்.

உங்களுக்கு இந்த கதம்ப சட்னியை எப்படி செய்வதென்று தெரிந்து கொள்ள வேண்டுமா? கீழே கதம்ப சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:
* எண்ணெய் – 2 ஸ்பூன்
* வேர்க்கடலை – 2 ஸ்பூன்
* கடலைப் பருப்பு – 2 ஸ்பூன்
* பொட்டுக்கடலை – 2 ஸ்பூன்
* உளுத்தம் பருப்பு – 2 ஸ்பூன்
* பச்சை மிளகாய் – 2
* வரமிளகாய் – 2
* சின்ன வெங்காயம் – 5
* பெரிய வெங்காயம் – பாதி
* பூண்டு – 4 பல்
* இஞ்சி – சிறிய துண்டு
* புளி – சிறிய துண்டு
* தக்காளி – 1 (நறுக்கியது)
* கொத்தமல்லி – சிறிது
* புதினா – சிறிது
* கறிவேப்பிலை – சிறிது
* துருவிய தேங்காய் – 1 கையளவு
* உப்பு – சுவைக்கேற்ப
* தண்ணீர் – சிறிது

தாளிப்பதற்கு…
* எண்ணெய் – 1 டீஸ்பூன்
* கடுகு – 1/2 டீஸ்பூன்
* உளுத்தம் பருப்பு – 1/2 டீஸ்பூன்
* கறிவேப்பிலை – 1 கொத்து
* வரமிளகாய் – 1

செய்முறை:
* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடலைப் பருப்பு, உளுத்தம் பருப்பு, வேர்க்கடலை, பொட்டுக்கடலை ஆகியவற்றை சேர்த்து பொன்னிறமாக வறுக்க வேண்டும்.
* பின்னர் அதில் பச்சை மிளகாய், வரமிளகாய், சின்ன வெங்காயம், பெரிய வெங்காயம், பூண்டு, இஞ்சி மற்றும் புளி ஆகியவற்றை சேர்த்து நன்கு வதக்க வேண்டும்.
* பின்பு அதில் நறுக்கிய தக்காளியை சேர்த்து நன்கு வதக்க வேண்டும்.
* பிறகு அதில் கொத்தமல்லி, புதினா, கறிவேப்பிலையை சேர்த்து நன்கு வதக்கி இறக்க வேண்டும்.
* அதன் பின் அதில் துருவிய தேங்காயை சேர்த்து கிளறி, குளிர வைக்க வேண்டும்.
* அடுத்து மிக்சர் ஜாரில் வதக்கிய பொருட்களை சேர்த்து, சுவைக்கேற்ப உப்பு சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்னர் ஒரு கிண்ணத்தில் அரைத்த சட்னியை எடுத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை, வரமிளகாய் சேர்த்து தாளித்து, சட்னியுடன் சேர்த்து கலந்தால், சுவையான கதம்ப சட்னி தயார்.