நோயெதிர்ப்பு சக்தியை அதிகரிக்கணுமா? அப்ப நெல்லிக்காயை இந்த 5 பொருட்களுடன் சேர்த்து சாப்பிடுங்க..

தமிழ்நாட்டில் டெங்கு, ப்ளூ காய்ச்சல் வழக்குகளின் எண்ணிக்கை அதிகரித்து வரும் நிலையில், உடலின் நோயெதிர்ப்பு சக்தியை வலிமையாக வைத்துக் கொள்ள வேண்டிய கட்டாயத்தில் உள்ளோம். உடலின் நோயெதிர்ப்பு சக்தியை அதிகரிக்க நாம் உண்ணும் சில உணவுகள் பெரிதும் உதவி புரிகின்றன. அதில் ஒன்று தான் நெல்லிக்காய். ஏனெனில் நெல்லிக்காயில் வைட்டமின் சி, பாலிஃபீனால்கள், ப்ளேவோனாய்டுகள் மற்றும் டானின்கள் போன்றவை அதிகளவில் நிறைந்துள்ளன.

அதுவும் நெல்லிக்காயில் உள்ள அதிகளவு வைட்டமின் சி மற்றும் பாலிஃபீனால்கள் இரத்த வெள்ளை அணுக்களின் செயல்பாட்டை மேம்படுத்த உதவுகின்றன. அதேப் போல் நெல்லிக்காயில் உள்ள சக்தி வாய்ந்த ஆன்டி-ஆக்ஸிடன்ட்டுகள் ஃப்ரீ ரேடிக்கல்களை நடுநிலையாக்குகிறது, ஆக்ஸிஜனேற்ற அழுத்தத்தைக் குறைக்கிறது மற்றும் முன்கூட்டிய வயது, வீக்கம் மற்றும் நாள்பட்ட நோயிலிருந்து செல்களைப் பாதுகாக்கிறது.

இப்படிப்பட்ட நெல்லிக்காயை தினமும் ஒன்று சாப்பிடுவது உடலில் பல மாயங்களைப் புரியும். குறிப்பாக இந்த நெல்லிக்காயை குறிப்பிட்ட சில உணவுகளுடன் சேர்த்து உட்கொள்ளும் போது உடலின் நோயெதிர்ப்பு சக்தி இரட்டிப்பாக அதிகரிக்கும். இப்போது உடலில் நோயெதிர்ப்பு சக்தியை இருமடங்கு அதிகரிக்க நெல்லிக்காயை எந்த உணவுகளுடன் சேர்த்து சாப்பிட வேண்டும் என்பதைக் காண்போம்.

1. தேன் + நெல்லிக்காய்

நெல்லிக்காயுடன் தேன் சேர்த்து சாப்பிடுவது மிகவும் சுவையாக இருப்பது மட்டுமின்றி, நோயெதிர்ப்பு சக்தியையும் இரட்டிப்பாக அதிகரிக்கும். அதில் நெல்லிக்காய் உடலின் இயற்கையான பாதுகாப்பு அமைப்பை வலுப்படுத்த உதவுகிறது. அதே நேரத்தில் தேன் தொண்டைப்புண்ணை ஆற்றுகிறது, குடல் ஆரோக்கியத்தை ஆதரிக்கிறது மற்றும் உடலுக்கு விரைவான ஆற்றலை வழங்குகிறது. தினமும் நெல்லிக்காயையும், தேனையும் ஒன்றாக எடுக்கும் போது, அது நோய்த்தொற்றுகளை எதிர்த்து போராட உதவுவதோடு, சுவாச மண்டலத்தையும் ஆதரிக்கிறது. அதற்கு 1 டீஸ்பூன் நெல்லிக்காய் பொடி அல்லது நெல்லிக்காய் ஜூஸ் உடன் 1 டீஸ்பூன் தேன் சேர்த்து கலந்து, காலையில் எழுந்ததும் வெறும் வயிற்றில் எடுக்க வேண்டும்.

2. மஞ்சள் + நெல்லிக்காய்

இந்த காம்பினேஷன் நோயெர்ப்பு சக்தியை வலுப்படுத்த பெரிதும் உதவுகிறது. நெல்லிக்காயில் வைட்டமின் சி அதிகம் கொண்டது, அதேப் போல் மஞ்சளிள் குர்குமின் ஏராளமான அளவில் உள்ளது. இவ்விரண்டும் ஒன்றாக உடலுக்கு கிடைக்கும் போது நோயெதிர்ப்பு மண்டலம் இரும்பு போல வலுவடையும், ப்ரீ ராடிக்கல்களை எதிர்த்துப் போராடும், இரத்த வெள்ளையணுக்களின் செயல்பாட்டை அதிகரிக்கும். அதற்கு வெதுவெதுப்பான நீருடன் 1 ஸ்பூன் நெல்லிக்காய் பொடி அல்லது எலுமிச்சை சாறு சேர்த்து, 1 சிட்டிகை மஞ்சள் தூள் சேர்த்து காலையில் எழுந்ததும் உட்கொள்ள வேண்டும்.

3. இஞ்சி + நெல்லிக்காய்

இந்த காம்போ நோயெதிர்ப்பு சக்தியை திறம்பட மேம்படுத்தும். அதுவும் வெதுவெதுப்பான நீரில் 2 டேபிள் ஸ்பூன் நெல்லிக்காய் ஜூஸ் மற்றும் 1/2 டீஸ்பூன் துருவிய இஞ்சியை சேர்த்து கலந்து, சுவைக்கேற்ப தேன் கலந்து, காலையில் எழுந்ததும் குடித்து வந்தால், அவற்றில் உள்ள வைட்டமின் சி நோயெர்ப்பு சக்தியை வலுப்படுத்தி, நோய்த்தொற்றுகளை அழித்து, உடலின் இயற்கையான பாதுகாப்பு மண்டலத்தை வலுப்படுத்துகின்றன. எனவே தவறாமல் ஒருமுறை இந்த ட்ரிக்கை ட்ரை செய்து பாருங்கள்.

4. எலுமிச்சை + நெல்லிக்காய்

நெல்லிக்காய், எலுமிச்சை ஆகிய இரண்டிலுமே வைட்டமி சில வளமான அளவில் உள்ளன. இவ்விரண்டையும் ஒன்றாக எடுக்கும் போது, அது தொற்றுகளை எதிர்க்கவும், உடலில் நச்சுக்களை அகற்றவும், சரும பொலிவை மேம்படுத்தவும் உதவுகிறது. முக்கியமாக இவற்றில் உள்ள ஆன்டி-ஆக்ஸிடன்ட் பண்புகள், இரத்த வெள்ளையணுக்களை வலுப்படுத்தி, ஒட்டு மொத்த உடல் ஆரோக்கியத்தை ஆதரிக்கின்றன. அதற்கு வெதுவெதுப்பான நீரில் 2 டேபிள் ஸ்பூன் நெல்லிக்காய் சாறு, பாதி எலுமிச்சை சாற்றினை கலந்து, காலையில் எழுந்ததும் வெறும் வயிற்றில் குடிக்க வேண்டும்.

5. துளசி + நெல்லிக்காய்

இவ்விரண்டுமே ஆயுர்வேதத்தில் உடலின் நேயெதிர்ப்பு சக்தியை அதிகரிக்க உதவுகின்றன. அதுவும் துளசி ஆன்டி-பாக்டீரியல், ஆன்டி-வைரல் மற்றும் உடலின் சமநிலையைப் பேணும் தன்மைக்கும் பெயர் பெற்றது. அதே வேளையில் நெல்லிக்காய் வைட்டமின் சி மற்றும் ஆன்டி-ஆக்ஸிடன்ட் பண்புகளைக் கொண்டது. இவ்விரண்டும் நோய்த்தொற்றுகள், மன அழுத்தம், சுவாச ஆரோக்கியத்திற்கு ஆதரவளிக்கிறது. அதற்கு சிறிது துளசி இலைகளை கொதிக்கும் நீரில் போட்டு சில நிமிடங்கள் கொதிக்க வைத்து இறக்கி, அதை ஒரு டம்ளரில் வடிகட்டி ஊற்றி, 1 டீஸ்பூன் நெல்லிக்காய் பொடி மற்றும் சுவைக்கேற்ப தேன் சேர்த்து கலந்து, டீ போன்று குடிக்க வேண்டும்.