இளம் பெண்களிடையே மார்பகப் புற்றுநோய் அதிகரிப்பது ஏன்?

மார்பகப் புற்றுநோய் என்றாலே வயதான பெண்களுக்குத் தான் வரும் என்று பலரும் நினைக்கிறார்கள். ஆனால், 20, 30 மற்றும் 40 வயதுகளில் உள்ள பெண்களுக்கும் இந்த நோய் ஏற்படலாம். இந்தியாவில் மேற்கொள்ளப்பட்ட புற்றுநோய் தொடர்பான ஆய்வுகள், காலப்போக்கில் மார்பகப் புற்றுநோய் பாதிப்பு அதிகரித்திருப்பதைக் காட்டுகின்றன. தேசிய புற்றுநோய்ப் பதிவுத் திட்டத்தின் (National Cancer Registry Programme) தரவுகளின்படி, 30 முதல் 39 வயதுக்குட்பட்ட பெண்களிடையே காணப்படும் முக்கியமான புற்றுநோய்களில் மார்பகப் புற்றுநோயும் ஒன்று.

இளம் பெண்களிடையே இந்த நோய் ஏற்படுவதற்கான காரணங்கள் இன்னும் முழுமையாகத் தெரியவில்லை. இருப்பினும், நோய் குறித்த விழிப்புணர்வுடன் இருப்பதும், அறிகுறிகள் தென்பட்டால் தாமதிக்காமல் மருத்துவரை அணுகுவதும் மிகவும் அவசியம். இந்த மார்பக புற்றுநோய் குறித்த விழிப்புணர்வை ஏற்படுத்த ஒவ்வொரு ஆண்டும் அக்டோபர் மாதம் மார்பகப் புற்றுநோய் விழிப்புணர்வு மாதமாக அனுசரிக்கப்படுகிறது

இந்த மார்பக புற்றுநோய் விழிப்புணர்வு மாதத்தை முன்னிட்டு இளம் பெண்களிடையே மார்பகப் புற்றுநோய் அதிகரிப்பது ஏன் என்பது பற்றியும், பெண்கள் ஒருபோதும் அலட்சியப்படுத்தக்கூடாத மார்பக புற்றுநோயின் அறிகுறிகள் குறித்தும் சென்னையில் உள்ள கிளீனீகிள்ஸ் மருத்துவமனையின் கதிர்வீச்சு புற்றுநோய் சிகிச்சை நிபுணரான டாக்டர் K. அஸ்மி சௌந்தர்யா அவர்கள் தமிழ் போல்ட்ஸ்கையுடன் பகிர்ந்து கொண்டார்.

இளம் பெண்களுக்கு மார்பகப் புற்றுநோய் ஏற்படுவது ஏன்?

“மார்பகப் புற்றுநோய் ஏற்படுவதற்கு ஒரே ஒரு காரணம் என்று சொல்ல முடியாது. குடும்பத்தில் யாருக்காவது மார்பகப் புற்றுநோய் இருந்திருப்பது, மரபணுக்களில் (Genes) ஏற்படும் சில மாற்றங்கள் போன்றவை இந்த நோய் ஏற்படுவதற்கான அபாயத்தை அதிகரிக்கலாம். குறிப்பாக, BRCA1 மற்றும் BRCA2 எனப்படும் மரபணுக்களில் ஏற்படும் மாற்றங்கள் இந்த அபாயத்தை அதிகரிக்கக்கூடும்.

மது அருந்துவது, அதிக உடல் எடை, உடல் உழைப்பு அல்லது உடற்பயிற்சி இல்லாத வாழ்க்கை முறை, ஹார்மோன் மாற்றங்கள் மற்றும் குழந்தைப்பேறு தொடர்பான சில காரணிகளும் மார்பகப் புற்றுநோய் ஏற்படும் அபாயத்துடன் தொடர்புடையவை.

ஆனால், இந்தக் காரணங்கள் மட்டுமே எல்லாப் பாதிப்புகளையும் விளக்கிவிடாது. மார்பகப் புற்றுநோயால் பாதிக்கப்படும் பல பெண்களுக்கு குடும்பத்தில் இந்த நோய் இருந்திருக்காது; வெளிப்படையான அபாயக் காரணங்களும் இருக்காது. எனவே, இளம் வயதில் இருப்பதால் மார்பகப் புற்றுநோய் ஏற்படாது என்று நினைக்கக் கூடாது.”

பெண்கள் அலட்சியப்படுத்தக் கூடாத அறிகுறிகள்
“மார்பகங்களில் ஏற்படும் மாற்றங்களைக் கவனிப்பதும், வழக்கத்திற்கு மாறான அறிகுறிகள் தென்பட்டால் மருத்துவரிடம் ஆலோசனை பெறுவதும் முக்கியம். பெண்கள் அவசியம் கவனிக்க வேண்டிய அறிகுறிகளாவன:
* மார்பகத்திலோ அல்லது அக்குள் பகுதியிலோ புதிதாகக் கட்டி அல்லது தடிப்பு ஏற்படுவது.
* மார்பகத்தின் அளவு, வடிவம் அல்லது தோற்றத்தில் மாற்றம் ஏற்படுவது.
* மார்பகத் தோலில் பள்ளம் விழுவது, சுருக்கம் ஏற்படுவது அல்லது தோல் சிவந்து காணப்படுவது.
* முலைக்காம்பு உள்ளே இழுக்கப்படுவது அல்லது வழக்கத்திற்கு மாறாகத் திரவம் வெளியேறுவது. குறிப்பாக, ரத்தம் கலந்த திரவம் வெளியேறினால் கவனிக்க வேண்டும்.
* மார்பகத்தின் குறிப்பிட்ட பகுதியில் தொடர்ந்து மாற்றம் அல்லது அசௌகரியம் இருப்பது. மார்பகத்தில் ஏற்படும் எல்லாக் கட்டிகளும் புற்றுநோயாக இருக்க வேண்டிய அவசியமில்லை. அதேபோல், மார்பக வலி மட்டும் இருப்பது பொதுவாக மார்பகப் புற்றுநோயின் அறிகுறியாக இருக்காது. இருப்பினும், புதிதாகத் தோன்றும் அல்லது தொடர்ந்து நீடிக்கும் எந்த மாற்றத்தையும் அலட்சியப்படுத்தாமல் மருத்துவரிடம் பரிசோதித்துக் கொள்வது நல்லது.” என்று டாக்டர் கூறினார்.

மார்பகப் புற்றுநோயைத் தடுக்க முடியுமா?

“எல்லா வகையான மார்பகப் புற்றுநோயையும் தடுத்துவிட முடியாது. இருப்பினும், சில வாழ்க்கை முறை மாற்றங்கள் நோய் ஏற்படும் அபாயத்தைக் குறைக்க உதவலாம்.
* ஆரோக்கியமான உடல் எடையைப் பராமரிப்பது * தொடர்ந்து உடற்பயிற்சி செய்வது
* மது அருந்துவதைக் குறைப்பது அல்லது தவிர்ப்பது
* புகையிலையைத் தவிர்ப்பது ஆகியவை ஒட்டுமொத்த உடல்நலத்துக்கு உதவுவதுடன், மார்பகப் புற்றுநோய் அபாயத்தையும் குறைக்க உதவலாம். பெண்கள் தங்கள் குடும்பத்தில் யாருக்காவது புற்றுநோய் இருந்ததா என்பதைத் தெரிந்து கொள்வதும் முக்கியம். குடும்பத்தில் பலருக்கு மார்பகப் புற்றுநோய் இருந்தாலோ அல்லது மரபணு மாற்றங்களால் நோய் ஏற்படும் அபாயம் இருக்கலாம் என்ற சந்தேகம் இருந்தாலோ, மருத்துவரிடம் ஆலோசனை பெற வேண்டும். மேலும், தங்களுடைய மார்பகங்கள் இயல்பாக எப்படித் தோற்றமளிக்கின்றன, எப்படி உணரப்படுகின்றன என்பதைப் பெண்கள் அறிந்து கொள்வது அவசியம். இதன் மூலம் வழக்கத்திற்கு மாறான மாற்றங்களை விரைவாகக் கவனிக்க முடியும்.” என்று கூறினார்.

மார்பக புற்றுநோய் பரிசோதனைகளை எப்போது செய்ய வேண்டும்?

“மார்பகப் புற்றுநோயைக் கண்டறிவதற்கான பரிசோதனைகள் எந்த வயதில் தொடங்க வேண்டும் என்பது ஒவ்வொருவரின் வயது, தனிப்பட்ட அபாயம் மற்றும் மருத்துவ வழிகாட்டுதல்களைப் பொறுத்து மாறுபடும். குடும்பத்தில் நெருங்கிய உறவினர்களுக்கு மார்பகப் புற்றுநோய் இருந்தாலோ அல்லது மரபணு மாற்றங்களால் அதிக அபாயம் இருந்தாலோ, இளம் வயதிலேயே மருத்துவரின் ஆலோசனையுடன் பரிசோதனைகளைத் தொடங்க வேண்டியிருக்கலாம்.” என்று டாக்டர் அஸ்மி கூறினார். மொத்தத்தில் மார்பகப் புற்றுநோய் விழிப்புணர்வு மாதம் நமக்கு ஒரு முக்கியமான விஷயத்தை நினைவூட்டுகிறது. இந்த நோய் எந்த வயதிலும் ஏற்படலாம். நமக்குள்ள தனிப்பட்ட அபாயத்தைப் புரிந்து கொள்வது, அறிகுறிகளைக் கவனிப்பது, சந்தேகத்துக்குரிய மாற்றங்கள் இருந்தால் தாமதிக்காமல் மருத்துவரை அணுகுவது ஆகியவை மிகவும் அவசியம். வாழ்க்கை முறையில் மாற்றங்களைச் செய்வதால் மார்பகப் புற்றுநோயை முழுமையாகத் தடுத்துவிட முடியாது. இருப்பினும், மருத்துவரின் ஆலோசனைப்படி உரிய பரிசோதனைகளை மேற்கொள்வதும், நோயை ஆரம்பத்திலேயே கண்டறிவதும், சரியான நேரத்தில் சிகிச்சையைத் தொடங்க உதவும்.