உங்ககிட்ட இந்த 5 காலை பழக்கங்கள் இருந்தா உடனே கைவிடுங்க.. அது உடம்பில் கெட்ட கொழுப்பை அதிகரிக்கும்!

உலகளவில் இதய நோய் ஒரு பெரிய கவலைக்குரிய ஒன்றாக உள்ளது. இப்படி இதய நோயால் ஒருவர் பாதிக்கப்படுவதற்கு காரணம் அவரது மோசமான வாழ்க்கை முறை, உணவுப் பழக்கங்கள் போன்றவை தான். இவை ஒரே நாளில் இதயத்தில் பாதிப்பை ஏற்படுத்துவதில்லை. மாறாக தினசரி மேற்கொள்ளும் போது, அதன் விளைவாக இதய ஆரோக்கியத்தை பாழாக்குகின்றன.

அதுவும் இதய நோய்க்கு கொழுப்புகள் தான் முக்கிய காரணியாக திகழ்கின்றன. குறிப்பாக எல்டிஎல் (LDL) எனப்படும் ‘கெட்ட’ கொழுப்புச்சத்து அதிகரிப்பது இதய நோய் அபாயத்தை உயர்த்தக்கூடும் என்பதால், அதை கட்டுப்பாட்டில் வைத்திருப்பது முக்கியம்.

ஆனால் நாம் தெரியாமல் செய்யக்கூடிய சில காலை பழக்கங்கள் ஆரோக்கியமான வாழ்க்கை முறைக்கு தடையாக இருக்கும் கெட்ட கொழுப்புக்களின் அளவை அதிகரிக்கலாம். உதாரணமாக அதிக சர்க்கரை அல்லது நிறைவுற்ற கொழுப்பு கொண்ட காலை உணவைத் தேர்ந்தெடுப்பது, உடற்பயிற்சியைத் தவிர்ப்பது போன்றவை உடலில் கெட்ட கொழுப்பு அதிகரிக்க வழிவகுத்து, நீண்ட காலத்தில் பாதிப்பை ஏற்படுத்தக்கூடும். இப்போது உடலில் கெட்ட கொழுப்பை அதிகரிக்கும் சில காலை பழக்கங்களைக் காண்போம். இந்த பழக்கங்கள் இருந்தால் உடனே கைவிடுங்கள்.

1. காலை உணவை தவிர்ப்பது

காலை உணவைத் தவிர்ப்பது கெட்ட கொழுப்பு அதிகரிப்புடன் வலுவாக இணைக்கப்பட்டுள்ளது. காலை உணவை தவறாமல் சாப்பிடுபவர்களுடன் ஒப்பிடும் போது காலை உணவைத் தவிர்க்கும் நபர்களுக்கு மொத்த கொழுப்பு மற்றும் கெட்ட கொழுப்பின் அளவு அதிகம் இருப்பதாக ஆய்வுகள் தெரிவிக்கின்றன.

2. அதிக கொழுப்புள்ள அல்லது பொரித்த காலை உணவை உண்பது

காலை வேளையில் பதப்படுத்தப்பட்ட இறைச்சிகள் மற்றும் எண்ணெயில் பொரித்த காலை உணவை உட்கொள்வது உடலில் கெட்ட கொலஸ்ட்ராலின் அளவை அதிகரிக்க வழிவகை செய்யும். ஏனெனில் இதில் உள்ள சாச்சுரேட்டட் கொழுப்புகள் மற்றும் ட்ரான்ஸ் கொழுப்புகள் உடலில் கெட்ட கொலஸ்ட்ரால் அளவை நேரடியாக அதிகரிக்கும்.

3. காலையில் அதிக மன அழுத்தத்தை அனுபவிப்பது

பொதுவாக காலையில் மன அழுத்த ஹார்மோனான கார்டிசோல் இயற்கையாகவே அதிகரிக்கும். இந்நிலையில் காலையில் அவசரமாக அலுவலகத்திற்கு கிளம்புவது அல்லது பதட்டத்துடன் நாளைத் தொடங்குவது, கூடுதல் மன அழுத்தத்தை அதிகரிக்கும். நாள்பட்ட காலை மன அழுத்தம் அதிக LDL அளவு மற்றும் அதிகரித்த வீக்கத்திற்கு பங்களிக்கக்கூடும். இது இதய நோய் அபாயத்தை அதிகரிக்கும் என்று ஆய்வுகள் தெரிவிக்கின்றன.

4. உடலுழைப்பில்லாமை

காலையில் எழுந்ததும் நடைப்பயிற்சி, ஸ்ட்ரெட்ச்சிங் போன்ற லேசான உடற்பயிற்சிகளை செய்யாமல் இருந்தால், கொழுப்பைக் கட்டுப்படுத்தும் உடலின் திறனைக் கட்டுப்படுத்தும். அதுவும் காலையில் செய்யும் உடற்பயிற்சி இரவு நேர கொழுப்பு உற்பத்தியை எதிர்த்து, சீரான கொழுப்பு சுயவிவரத்தை பராமரிக்க உதவும் என்று ஆராய்ச்சி சுட்டிக்காட்டுகிறது.

5. தாமதமாக தூங்கி எழுவது

காலையில் தாமதமாக தூங்கி எழுவது அல்லது ஒழுங்கற்ற தூக்க முறையை மேற்கொள்வது உடலின் சர்க்காடியன் தாளத்தை சீர்குலைக்கிறது. கல்லீரலில் உள்ள கொழுப்பு தொகுப்பு தான் தினசரி சர்க்காடியன் தாளத்தைப் பின்பற்றுகிறது. மேலும் ஒழுங்கற்ற காலை வழக்கங்கள் வளர்சிதை மாற்ற செயல்முறைகளை தவறாக சீரமைக்கும். இது அதிக எல்.டி.எல் உற்பத்தி மற்றும் குறைந்த எச்.டி.எல் அளவுகளுக்கு பங்களிக்கிறது.