பட்டு போன்ற மென்மையான சருமத்துக்கு ரோஜா இதழ்களை எப்படியெல்லாம் பயன்படுத்தலாம்!

சருமத்தை பொலிவாக வைக்க விரும்பினால் நீங்கள் நீரேற்றத்துடன் இருக்க வேண்டும் என்கிறார் அழகுக்கலை நிபுணர் டாக்டர் வசுந்தரா. இயற்கையாக உடலை போதுமான நீரேற்றத்துடன் வைத்திருந்தாலும் சருமத்தை நீரேற்றமாக வைத்திருக்க வெளிப்பூச்சு பயன்படுத்துவதாக இருந்தால் நீங்கள் டோனர் பயன்படுத்த வேண்டும். குறிப்பாக அதிக பலன்களை கொண்ட ரோஸ் டானிக் பயன்படுத்தலாம். இதன் மூலம் சருமத்துக்கு வேண்டிய நீர்ச்சத்து பெற்றுவிடலாம். இது குறித்து இன்னும் விளக்கமாக பார்க்கலாம்.

ரோஜா சருமத்துக்கு செய்யும் நன்மைகள்

பூக்களில் மென்மையானவை என்றால் அது ரோஜா தான். இது சருமத்துவாரங்களை இறுக்கும். சருமத்தை குளிர்ச்சியாக வைத்திருக்க செய்யும். வெயிலிலிருந்து வரும் போது சருமத்தை பாதுகாக்கும். சூரியனிடமிருந்து நம் சருமத்தை பாதுகாப்பதிலும் ரோஜா முக்கியமானதாக செயல்படுகிறது.

மன அழுத்தம் இருக்கும் போது ரோஜா இதழ் கொண்டு தயாரிக்கப்பட்ட எசென்ஸ் எண்ணெயை முகர்ந்து பார்ப்பதன் மூலம் மன அழுத்தம் குறையும். இது உற்சாகமான மனநிலையை மேம்படுத்தக்கூடியது.

​சரும டேனை அகற்றும் ரோஜா இதழ்கள்​

ரோஜா இதழ்கள் – அரை கைப்பிடி

தேன் – 1 டீஸ்பூன்

ரோஜா இதழ்களை சுத்தமான நீரில் ஊறவைத்து அரைத்து தேன் கலந்து முகத்து தடவினால் சன் டேன் குறைவதை பார்க்கலாம்.

சருமநிற மாற்றத்தை குறைக்க

ரோஜா இதழ் – அரை கப்
சந்தனம் பொடி – 1 டீஸ்பூன்
தேன் – அரை டீஸ்பூன்
பன்னீர் – 1 டீஸ்பூன்

அனைத்தையும் நன்றாக கலந்து முகத்தின் பின்பகுதி கழுத்துப்பகுதி, கை, கால் என சூரியன் வெளிப்படும் இடங்களில் தடவி சில நிமிடங்கள் கழித்து வெதுவெதுப்பான நீரில் கழுவி விடுவதன் மூலம் சூரியனால் சேதமடைந்த சருமம் மீண்டு வரும்.

​பருக்கள் குறைவதற்கு ரோஜா பேக் போடலாமா?…
​
முகத்தில் அதிகமாக பருக்கள் இருந்தால் அது முக தோற்றத்தை குறைத்து காட்டும். இவர்கள் பருக்களுக்கான பேக் போடுவதாக இருந்தால் ரோஜா பேக் போடலாம். ரோஜா இதழ்களை வெயில் படாமல் உலர்த்தி நன்றாக பொடித்து வைத்துகொள்ள வேண்டும். இந்த பொடியை காற்றுப்புகாத கண்ணாடி டப்பாவில் எடுத்து பதப்படுத்தி வைத்துகொள்ள வேண்டும். இப்போது என்ன செய்வது என்பதை பார்க்கலாம்.

தேவை

ரோஜா பவுடர் – 1 டீஸ்பூன்
தண்ணீர் – தேவைக்கு

செய்முறை

இரண்டையும் கலந்து முகத்தில் தடவி 15-20 நிமிடங்கள் வைத்திருந்து பிறகு முகத்தை சுத்தம் செய்து வந்தால் பருக்கள் குறைய தொடங்கும். தேவையெனில் முல்தானி மிட்டி கலந்தும் பயன்படுத்தலாம்.

​கண்களுக்கு கீழ் உள்ள கருவளையம் குறைய ரோஜா எப்படி பயன்படுத்துவது…

கண்கள் தான் முகத்தின் அழகை அதிகரிக்க கூடிய உறுப்பு கண்கள் புத்துணர்ச்சியாக அழகாக பொலிவாக காட்ட வேண்டும் என்றால் கண்களுக்கு கீழ் கருவளையம் இருக்க கூடாது. கருவளையம் கொண்டிருப்பவர்கள் ரோஜா இதழ்களை எப்படி பயன்படுத்தலாம் என்பதை பார்க்கலாம்.

தேவை

ரோஜா இதழ்கள் – 6 -8
இளஞ்சூடான நீர் – 2 டீஸ்பூன்

ரோஜா இதழ்களை நன்றாக அரைத்து இளஞ்சூடான நீரில் கலந்து கொள்ளவும். இவை திரவ வடிவில் இருக்கட்டும். பிறகு இதில் ஒரு காட்டன் பஞ்சு உருண்டையை கொண்டு தொட்டு தொட்டு முகத்தில் கண்களில் ஒற்றி ஒற்றி எடுத்தால் கருவளையம் நன்றாக மறைவதைஉணர தொடங்குவீர்கள். ஆனால் கண்களுக்கு உள்ளே செல்லாமல் பார்த்துகொள்ளுங்கள்.

​உச்சந்தலை உஷ்ணத்தை குறைக்கும் ரோஜா இதழ்​

உச்சந்தலை வறட்சி மற்றும் வெப்பத்தால் முடி வளர்ச்சி பாதிக்கப்படலாம். உச்சந்தலையை குளிர்ச்சியாக்க ரோஜா இதழ்கள் உதவும்.

தேவை

ரோஜா இதழ் – ஒரு கைப்பிடி (கூந்தல் அளவுக்கேற்ப)
பாலக்கீரை – ஒரு கைப்பிடி (கூந்தல் அளவுக்கேற்ப)
தண்ணீர் – தேவைக்கு

ரோஜா இதழ்களுடன் பாலக்கீரையை நறுக்கி இரண்டையும் ஒன்றாக சேர்த்து மைய அரைத்து உச்சந்தலை முழுவதும் தடவி சில நிமிடங்கள் ஊறவிடவும். பிறகு கூந்தலை வெதுவெதுப்பான நீரில் அலசி எடுக்கவு. இது கூந்தல் வளர்ச்சிக்கும். உச்சந்தலை குளிர்ச்சிக்கும் பெரிதும் உதவக்கூடும்.

​உதடு கருமையை போக்கும் ரோஜா இதழ்​

லிப்ஸ்டிக் பயன்படுத்துவதால் உதடுகள் கருமையாக பொலிவில்லாமல் இருக்கலாம். இந்த கருமையை போக்குவதிலும் ரோஜா இதழ்கள் உதவுகிறத. எளிமையான முறையில் உதட்டின் கருமையை போக்க

தேவை
ரோஜா இதழ் – 5
சர்க்கரை – அரை டீஸ்பூன்

இரண்டையும் நன்றாக குழையும் வரை இடித்து அதை உதட்டில் மென்மையாக ஸ்க்ரப் செய்வது போன்று செய்து வந்தால் உதட்டின் கருமை மற்றும் வறச்ட்சி நீங்கும். இது பாதிப்பில்லாதது. எனினும் சரக்கரை பொடிக்காமல் வேகமாக தேய்ப்பது காயத்தை உண்டு செய்யலாம்.

​சருமம் கூந்தல் பொலிவாக இருக்க ரோஜா இதழ்கள் எப்படி பயன்படுத்துவது​

ரோஜா இதழ் – 100 கிராம்
வெந்நீர் – 1 லிட்டர்

வெந்நீரில் ரோஜா இதழ்களை போட்டு மூடி விடவும். இவை நன்றாக ஊறியதும் இந்த தண்ணீரை உடல் முழுவதும், கூந்தல் என அனைத்துக்கும் பயன்படுத்தலாம். உடல் துர்நாற்றம் பிரச்சனை உள்ளவர்கள் குளிக்கும் நீரில் ஒரு கப் ரோஸ் வாட்டர் கலந்து குளிக்கலாம். இதன் மூலம் டியோரண்ட் பயன்படுத்தாமலே உடல் நறுணமாக இருப்பதை பார்க்கலாம். பட்டுபோன்ற மென்மையை பெறுவதற்கு ரோஜா இதழ்களே போதுமானதாக இருக்கும்.

ரோஜா இதழ்கள் எளிதில் கிடைக்ககூடியவை. நீங்கள் ரோஜா இதழ் பயன்படுத்துவதாக இருந்தால் பன்னீர் ரோஜாக்கள் பயன்படுத்த வேண்டும்.