வெங்காயம் தக்காளி தொக்கு

தேவையான பொருட்கள்:

* பெரிய வெங்காயம் – 2 (நறுக்கியது)

* தக்காளி – 2 (நறுக்கியது)

* இஞ்சி பூண்டு பேஸ்ட் – 1 டீஸ்பூன்

* மிளகாய் தூள் – 2 டீஸ்பூன்

* மல்லித் தூள் – 1 டீஸ்பூன்

* உப்பு – சுவைக்கேற்ப

தாளிப்பதற்கு…

* எண்ணெய் – 3 டேபிள் ஸ்பூன்

* கடுகு – 1 டீஸ்பூன்

* சீரகம் – 1/2 டீஸ்பூன்

* கறிவேப்பிலை – சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகைப் போட்டு தாளிக்கவும். அதன் பின் சீரகம் மற்றும் கறிவேப்பிலை சேர்த்து தாளிக்கவும்.

* பின்பு அதில் வெங்காயத்தைப் போட்டு நன்கு வதக்கி, பின் இஞ்சி பூண்டு பேஸ்ட் மற்றும் தேவையான அளவு உப்பு சேர்த்து 2 நிமிடம் வதக்கவும்.

* பிறகு அதில் தக்காளியை சேர்த்து நன்கு மென்மையாகும் வரை வதக்கவும்.

* பிறகு கரண்டியால் தக்காளியை மசித்து விட்டு, 2 நிமிடம் மூடி வைத்து அல்லது பச்சை வாசனை போகும் வரை வேக வைக்கவும்.

* அடுத்து காஷ்மீரி மிளகாய் தூள் மற்றும் மல்லித் தூள் சேர்த்து மசாலா கருகாமல் ஒரு நிமிடம் வதக்கி, பின் கால் கப் நீரை ஊற்றி 2 நிமிடம் நன்கு வேக வைக்கவும்.

* தொக்கு பதத்திற்கு வந்ததும், அடுப்பை அணைத்துவிட்டால், சுவையான வெங்காயம் தக்காளி தொக்கு தயார்.

குறிப்பு:

* தொக்கு செய்வதற்கு பயன்படுத்தும் தக்காளி நன்கு கனிந்ததாக இருக்க வேண்டும்.

* மசாலா பொடிகளை சேர்த்த பின், பொடிகள் கருகாமல் பார்த்துக் கொள்ளுங்கள். இல்லாவிட்டால், மசாலா பொடிகளை சேர்த்ததும் ஒருமுறை கிளறிய பின் உடனே நீரை சேர்த்துக் கொள்ளுங்கள். மசாலா பொடி கருகிவிட்டால், தொக்கின் சுவை மோசமாக இருக்கும்.

* உங்களுக்கு இன்னும் சுவையானதாக வேண்டுமானால், கரம் மசாலாவை சேர்த்துக் கொள்ளலாம். அதோடு தாளிக்கும் போது சிறிது சோம்பு விதைகளையும் சேர்த்துக் கொள்ளலாம்.