சவுண்ட் பாத் தெரபி பற்றி கேள்விப்பட்டிருக்கீங்களா? அத செஞ்சா மன அழுத்தம் குறையுமாம்..
இந்த கொரோனா காலக்கட்டத்தில் சிறியவர்கள் முதல் பெரியவர்கள் வரை சந்திக்கும் மிகப்பெரிய பிரச்சனையாக இருப்பது கொரோனா நோய்த் தொற்று வருமோ என்னும் பயத்தை அடுத்து ஏற்படுவது மன அழுத்தம் தான். எதற்கெடுத்தாலும் டென்ஷன், வீட்டிலேயே இருந்து செய்யும் வேலையில் அழுத்தம், மாணவர்களுக்கு இணையவழி வகுப்புகள், தேர்வு அழுத்தம், குடும்ப பிரச்சினைகள், நண்பர்களுடனான சண்டை சச்சரவுகள் என்று சுற்றிச்சுற்றி நம் மன அழுத்தத்தை அதிகரிக்க ஏகப்பட்ட விஷயங்கள் இருக்கின்றன.
இந்த மன அழுத்தத்தைக் குறைக்க என்னதான் செய்வது, கூட்டம் ஒரு பக்கமும், மன அழுத்தத்துக்காக மருந்து மாத்திரைகளை நாடிச் செல்பவர்கள் என்று அவர்கள் ஒரு பக்கமும் என்று மக்கள் சுற்றித் திரிகின்றன. ஆனால் அவையெல்லாம் தேவையில்லை. இசையைக் கேட்டுக் கொண்டே குளித்தாலே மன அழுத்தம் பறந்தோடி விடும் என்று சொல்கிறார்கள் ஆய்வாளர்கள்.
இசை தெரபி குளியல்
இந்த இசை தெரபி குளியல் மூலமாக மன அழுத்தத்தை எளிதாக போக்கிட முடியும் என்கிறார்கள் மனநல மருத்துவர்கள். இசையே அருமருந்து என்பார்கள். அதுபோலத்தான் இந்த மன அழுத்தத்திற்கு இசை ஒரு சிறந்த தெரபியாக பயன்படுகிறது. இசையைப் பிடிக்காதவர்கள் யாரேனும் இருக்க முடியுமா? இசை தான் இந்த உலகத்தில் உள்ள எல்லா உயிர்களையும் பாரபட்சமின்றி ஈர்க்கக் கூடியது. அந்த இசையொலியை வைத்துத் தான் மன அழுத்தத்திற்கு சிகிச்சை அளிக்கிறார்கள். மன அழுத்தத்தை போக்க சவுண்ட் பாத் தெரபி தற்போது செய்யப்படுகிறது. மன அழுத்தம் மற்றும் பதட்டம் தொடர்பான விளைவுகளை இந்த தெரபி மூலம் மாற்ற முடியும்.
சவுண்ட் தெரபி செயல்படும் முறை
இந்த சவுண்ட் தெரபி தியானம் மற்றும் கற்பனை ஓட்டங்கள் மாதிரி செயல்படுகிறது. இது உங்கள் கிளர்ச்சியுற்ற நரம்புகளை அமைதிப்படுத்தி உணர்வுகளை கட்டுப்படுத்துகிறது.
எப்படி சில நேரங்களில் உடம்பு வலிக்கு வெதுவெதுப்பான குளியல் எடுத்துக் கொள்வது போல இந்த சவுண்ட் பாத் மன வலிக்கு இதமாக மாறுகிறது. இசைக்கருவிகள், இசை ஊடகங்களை பயன்படுத்தி மனதுக்கும் உடலுக்கும் ஒரு முழுமையான நிம்மதியை தர உதவுகிறது.
இந்த சிகிச்சை தற்போது எல்லோர் மத்தியிலும் பிரபலமாகி வருகிறது. இந்த சவுண்ட் பாத் (இசைக்குளியல்) மன அழுத்தத்தை அதன் வேரிலிருந்து எதிர்த்து போராட உதவியாக இருக்கும்.
இசைக் குளியல்
சவுண்ட் பாத் எடுத்துக் கொள்ள எந்த வித விதிகளும் இல்லை. சாதாரணமாக நீங்கள் ஒரு நாற்காலியில் அமர்ந்து கொண்டோ அல்லது படுத்துக் கொண்டோ நிதானமாக கண்களை மூடிக் கொண்டு அறையில் வெளிப்படும் ஒலிகள் மற்றும் இசையை காதால் கேட்டு ரசிக்க வேண்டும். சில நேரங்களில் அறையில் இனிமையான ஒலிகளை அறிமுகப்படுத்த ஃபோர்க்ஸ், கோங்ஸ், படிக கிண்ணங்கள் மற்றும் சைம்ஸ் போன்ற கருவிகள் பயன்பாட்டுக்கு கொண்டு வரப்படுகின்றன. சில மருத்துவ சிகிச்சையாளர்கள் தங்கள் சொந்த குரலில் இசையை எழுப்பிக் கூட உங்களை குணப்படுத்த உதவுகின்றன.
உணர்வுகளைத் தூண்டும்
இந்த இசை குளியலை நீங்கள் மனதார கேட்கும்பொழுது, உங்கள் உணர்வுகள் யாவும் உங்களுடைய கட்டுப்பாட்டுக்குள் வருகின்றன. இசைத்தட்டுக்கள், ஸ்பீக்கர், கோங்ஸ் மற்றும் பிற கருவிகளின் பயன்பாட்டின் மூலம், உருவாக்கப்பட்ட அதிர்வுகள் உங்களைச் சுற்றிலும் மன அமைதி, சமநிலை மற்றும் தளர்வு உணர்வைத் தருகின்றன. இதனால் மன ரீதியான பிரச்சினைகள் குணப்படுத்துவதற்கான சூழல்களும் மேம்படுகின்றன.
இது உடலைப் படிப்படியாக தியான நிலைக்குத் தள்ளுகிறது. இப்படி இசை தியானம் செய்யும்போது தூக்கப் பிரச்சனை, நினைவாற்றல் மற்றும் செரிமானத்தை பாதிக்கும் பிற தூண்டுதல்களைச் சமநிலைப்படுத்தி, நீண்ட கால நோய்கள் நம்மை ஆட்கொள்ளாமல், மன அழுத்தத்தைப் போக்குகிறது.
இதயம் மற்றும் சுவாசத்தின் வேகத்தை நிதானப்படுத்தி உடலில் ஒரு சமநிலையை உருவாக்குகிறது.
மனக்கழிவுகளை வெளியேற்ற
இது உங்கள் எண்ணங்களில் கலந்துள்ள நச்சுக்களை வெளியேற்றவும், உடல் ரீதியாகவும் மன ரீதியாகவும் நீங்கள் தளர்வாக இருக்க உதவும். நரம்பு மண்டலத்தை மீட்டமைப்பதற்கும், நோய் எதிர்ப்பு சக்தியை அதிகரிப்பதற்கும், வலி நடுக்கங்களை சமாளிக்கவும் பயன்படுகிறது. எனவே மன அழுத்தம் மற்றும் பதட்டம் நிறைந்த காலங்களில் இது போன்ற இசை குளியல் எடுப்பது சிறந்தது.
இப்படி மன அழுத்தத்தை குறைப்பதற்கான ஒரு மாற்று வடிவம் மக்களிடையே நல்ல வரவேற்பை பெற்றிருக்கிறது. இது ஒரு பாரம்பரிய மருத்துவ முறையின் வடிவமாக இருப்பதால் நிபுணர்களும் இந்த முறையைப் பரிந்துரைக்கின்றனர். எனவே இனி மன அழுத்தம் என்றால் பயந்து ஓடாதீர்கள் இசையால் விரட்டுங்கள், உங்கள் மனமும் உடலும் இதமாக இசையில் நனையட்டும்.
