ஃபேஷன்

விருந்து நிகழ்ச்சிக்கு என்ன அணிந்து செல்லலாம் ?

திருமண வரவேற்பு, திருமணம், பிறந்த நாள் விழா, நவராத்திரி விழா, தீபாவளி பார்ட்டி, அலுவலக பார்ட்டி, குடும்ப விழாக்கள் என எந்த ஒரு நிகழ்ச்சிக்கும் அழைப்பு என்று வந்து விட்டால் நம்மை அறியாமலேயே உற்சாகமும், என்ன அணிந்து செல்வது? என்ற மிகப் பெரிய கேள்வியும் எழும். அதுவும் திருமண விழா என்று வந்து விட்டால் கல்யாண வீட்டுக்காரர்களை விட விருந்தினர்களாகச் செல்லும் நமக்குத்தான் என்ன அணிந்து கொள்வது? என்பதே புரிபடாது.

உலகின் எந்த மூலையில் நடக்கும் இந்தியத் திருமணம் என்றாலும் அதற்குப் பாந்தமான மற்றும் பொருத்தமான உடை என்று எத்னிக் ஆடைகளைச் சொல்லலாம். சேலைகள், சல்வார் சூட்டுகள் மற்றும் லெஹங்கா சோளி என ஒவ்வொரு சமூகக் கலாச்சாரத்திற்கு ஏற்றாற்போல் நாம் உடைகளை அணிந்து செல்லலாம்.

* வட இந்தியத் திருமணங்கள் பொதுவாகவே ஆடல் பாடல் என்று அமர்க்களமாகவும், பிரகாசமாகவும் இருக்கும். எனவே, மெட்டாலிக் கோல்டன் பட்டிஸ்களுடன் இருக்கும் ப்ரொகேட் லெஹங்காக்கள் மற்றும் பிரகாசமான ராணி இளஞ்சிவப்பு சேலைகளை அணிந்தால் அவை ஆடம்பரமான தோற்றத்தைத் தருவதாக இருக்கும். கிறிஸ்டல் பதித்த நெக்லைன்ஸ் மற்றும் சங்கி அலங்காரத்துடன் நாம் விழாவில் நுழைந்தால் அனைவரது தம்ஸ் அப் நமக்கே என்பதில் சந்தேகமே வேண்டாம்.

* வட இந்தியத் திருமணங்களை ஒப்பிடும்பொழுது தென்னிந்தியத் திருமணங்கள் மாறுபட்டவை. ஆனால், உடை விஷயத்தில் பாரம்பரிய நெசவுப் புடவைகளான காஞ்சிப் பட்டு மற்றும் பட்டின் பல வகைகளை அணிந்து கொள்வதைப் பெருமிதமாக நினைக்கிறார்கள். எனவே, இதுபோன்ற திருமணங்களுக்கு பட்டுச் சேலைகள் அல்லது அணிந்து கொள்ள வசதியான பட்டு சல்வார் சூட், பிளெயின் ஜ்யார்ஜெட் சூட்டுடன் டிசைனர் துப்பட்டாவை அணிந்து செல்லலாம்.

இரவு நேரத் திருமணம் அல்லது வரவேற்பு நிகழ்ச்சிகளுக்குச் செல்வதாக இருந்தால் நாம் அணியும் ஆடைக்குத் தகுந்தாற் போல் வைர, அமெரிக்கன் டைமண்ட், ஜெர்க்கான் கற்கள் பதித்த நகைகளை அணியலாம்.

* இஸ்லாமிய கலாசாரத்தின் திருமண விழாவான நிக்கா’ என்றால் அணிந்து செல்லக்கூடிய ஆடைகளின் வண்ணங்கள் மற்றும் ஸ்டைலில் சிறிதளவு மாறுபாடுகள் இருக்கும். ஷராரா சூட்ஸ், அனார்கலி சூட்ஸ் மற்றும் இந்தோ-வெஸ்டர்ன் லெஹங்கா ஆடைகளை அணிந்து செல்லலாம்.

* கிறிஸ்துவத் திருமணங்களில் லாங் குர்த்திஸ், லாங் ஃப்ராக், சுடிதார்கள், லெஹங்காக்கள் என அணியலாம். திருமணப் பெண் அழகிய வெள்ளை நிற ஃப்ராக்கில் வரும்பொழுது அந்தத் திருமணத்திற்குச் செல்லும் நாமும் லாங் ஃப்ராக் போன்றவற்றை அணிந்தால் மிகவும் பொருத்தமாக இருக்கும். லாங் ஃப்ராக் அணியும் பொழுது மிகவும் மெல்லிய செயின், மெல்லிய ப்ரேஸ்லெட், மாடர்ன் காதணி போன்றவற்றை அணிந்து சென்றால் அனைவரது கவனத்தையும் ஈர்ப்பராக நாம் இருப்போம்.

நீங்கள் விரும்பினால் தவிர உங்கள் உடையை ஒட்டுமொத்த சமூகத்துடன் உங்களால் தொடர்பு படுத்த முடியாது. ஒரு விருந்தினராக தென்னிந்தியத் திருமணத்திற்கு ஷராராவும், வட இந்தியத் திருமணத்திற்கு காஞ்சிபுரம் பட்டுச் சேலையும் அணிந்து செல்வது நம்முடைய விருப்பம் மற்றும் வசதியைச் சார்ந்ததாகும். இதில் மனதில் கொள்ள வேண்டியது என்னவென்றால் உடையானது பாரம்பரியமாகவும், அடக்கமாகவும் இருக்க வேண்டும்.

வண்ணங்கள்

இந்தியத் திருமணங்களில் அணியக்கூடிய எத்னிக் ஆடைகள் மிகவும் வண்ணமயமானதாக இருக்கும். ட்ரெஸ் கோட் அல்லது கலர் தீம் போன்றவை இல்லை என்றால் பிரகாசமான பிங்க், உயிரோட்டமான பச்சை, அடர் நீலம் எனப் பட்டாம்பூச்சி போல் பல்வேறு வண்ணங்களில் அணியலாம்.

அடர்ந்த சிவப்பு / மெரூன் புடவைகள் மற்றும் லெஹங்கா சோளிகளை மணப்பெண்கள் பெரும்பாலும் அணிவதால் அவற்றை நாம் தவிர்க்கலாம். அதேபோல் முழு வெள்ளை மற்றும் கருப்பு நிற ஆடைகளை இதுபோன்ற மங்கள நிகழ்ச்சிகளுக்கு அணிந்து செல்வதை (திருமண வீட்டார் விரும்பாத பட்சத்தில்) தவிர்க்கலாம்.

அணிகலன்கள்

ஆடைக்கேற்ற ஆபரணங்கள் என்பவை தவிர்க்க முடியாத ஒன்றாகி விட்டது. தங்க, வைர நகைகள் மட்டுமல்லாமல் இமிடேஷன் நகைகளும் திகைப்பூட்டும் அளவிற்கு அணிந்தால் ஆடம்பரமான தோற்றத்தைத் தருவதாக வந்து விட்டன.

நெக்லஸ், ஹாரம், சோக்கர், அட்டிகை, பிப் நெக்லஸ், ஆத் நெக்லஸ், காலர் நெக்லஸ், குந்தன் ஜ்வல்லரி, கோல்ட் ஜ்வல்லரி, டெம்பிள் ஜ்வல்லரி, காசுமாலை, ஃப்லிக்ரீ ஜ்வல்லரி, ஆன்டிக் ஜ்வல்லரி, நவரத்ன அணிகலன், மாங்கா மாலை, மீனாகாரி ஜ்வல்லரி என எதை வேண்டுமானாலும் நம் நடைக்குப் பொருத்தமானதைத் தேர்ந்தெடுத்து அணியலாம்.

சில உடைகளுக்கு மிகப்பெரிய ஜிமிக்கிகளை அணியும் பொழுது பார்ப்பவரை கவரக்கூடியதாக இருக்கும்.

இவ்வளவு அழகான ஆடைகள் மற்றும் அணிகலன்களை அணியும்பொழுது அதற்கு ஏற்றாற்போன்ற காலணிகளை மிகவும் கவனத்துடன் தேர்ந்தெடுத்து அணிய வேண்டும். எம்ப்ராய்டரி ஜுட்டில், வண்ணமயமான சப்பல்கள், கட் ஷூக்கள் மற்றும் கற்கள் பதித்த குதிகால் செப்பல்களை தேர்வு செய்து அணியலாம்.

அதே போல் காலணிகளை முதன் முதலாக நாம் செல்லும் விழாக்களுக்கு அணிந்து செல்வதைத் தவிர்க்க வேண்டும். ஏனென்றால், சில நேரங்களில் புதிய காலணிகள் கால்களுக்கு ஒத்துழைக்காமல் பிரச்சனையைத் தரும். அதுபோன்ற சந்தர்ப்பங்களில் எவ்வளவு நேர்த்தியாக உடை உடுத்தி அலங்காரம் செய்திருந்தாலும் காலணி ஒத்துவரவில்லை என்றால் அந்த விழாவில் நாம் முழுமனதுடன் உற்சாகமாக இருக்க முடியாது.

காலணி மட்டுமல்ல உடைகளைக்கூட முதன் முதலாக விழாவிற்குப் செல்லும் நேரத்தில் அணிவதை விட முன்னதாகவே அணிந்து பார்த்து அவை நமக்கு எல்லா விதத்திலும் சரியாக இருக்கிறதா என்பதை உறுதி செய்து கொள்வது நல்லது.

Related Articles

Close